Soh Dem Tull

Soh∙Dem∙Tull bin up ar aerport wayten f’ hes maet f’ kleer customs.

“Trewly Soh, es strainj theng yu el fine wen yu nor gut a gun!”

“Gut∙A∙Muun! Es guud f’ sii yu tuu!”

“Bin es lorng taim, myse maet.”

“Truu dat!”

“Wuthen dar new fanse maed owt o’ doun yonna?”

“Fanse? Wuthen yu torken bowt? Gut ooni barb wire en ‘ post”

“Dar wun o’er dair, es kinda skwair luuken, doun siid o’ dar aerport.”

“Dar ent wun fanse Gut, es kar dem bin krush up.”

“Yorlye gut wun krusha? Mi hang, thengs sey chanj sinse I se gorn.”

“Nort orlways f’ d’ batta myse maet, I larna yu! Dar krusha el ooni krush dem small kaa not muj bigga than wun frij.”

“Ahh well, es progress enisiid, waa? We still yusen dem f’ fill up gen Lone Pine?”

“No. orl dar sey dun. Dem was gonna yuse et en send et orl off to be resykled.”

“En waa, dar es guud munni rait dair!”

“Waal, yumait bii el thort daa, but tun owt dem newa tek out dem seats en a theng, so dem es orl Kontaminated, so kaa goh o’er d’ wai!”

“Dar kaa du. So wuthen gwen happen ef dem kaa tek et ‘wai ulla bunn et, Soh?”

“Waal, I b’lewe es aklans nuu walcum mat f’ orl dem wisitor.”

“Yu mait bi riit dair, Soh, yu el see et kleerly wen yu et Norf’k’s gateway!”

“Es truu ess da bible, so dem tull!”