Soh Dem Tull

Soh∙Dem∙Tull torken gen his maet Ay Se Pilli dar tada dae. Dem torken ‘bowt dem mein from Telekom tunnen orf dar foen system so dem el replace wun part.

“Es truu Soh, I thort dar system gwen run muj bata wunce dem se dun.”

“I nor thort, Ay. Ef ennitheng, gwen get wussa.”

“Fuut yu tull dar, Soh?”

“Waal dem nor replacing it f’ mek et work bata, dars f’ shor.”

“Dar nor mek sens, Soh. Ef dem chanjen et, muss bi kos se brek.”

“Yu mait bi el thort dar, but dem replacing et kos dem hat, nort kos dem wunt.”

“Soh, yu nor mekken sens. Wuthen gwen orn?”

“Waal, dar part hat f’ bi replaced kos ent from o’er d’ wae. Tun owt, es maed in China en dem nor wunt f’ yuse et.”

“Waaah? Dem mus be es mard un. Shorly yu johken?!”

“I shor dem salan hu mek et nor gwen ewen nohtiss dem se heaw et ‘way.”

“Unai, dem el kut orf dem’s nose f’ spite dems face.”

“Es truu ess da bible, so dem tull!”