Soh Dem Tull

Soh∙Dem∙Tull bin lissen tu dar radio dis dae. He ya dar anownsa tull dem gwen get nada konsultant ya f’ putt a krossen een Bun Pine.

He bin tork nehsi gin ar radio, but he nor feel any bata f’ doen et, soh he head orf tu dar Leagues Club f’ wun ninni. He starnen gen dar bar wen his maet Ent-a-Theng walk een.

“Miword Soh, yu draggen a lep dis dae. Wuthen rong?”

“I jes bin lissen gen dar radio, dars fuut I gut ‘ moon.”

“Waal, yu noh d’ ansa dair myse maet. Du lissen!”

“Yu nor guud myse maet. How I gwen noh wuthen happenen ya, ef I nor lissen? Trewly yu kaa du!”

“Oh-kay, Soh, wuthen se mek yu frothy?”

“Dem tull dem se hire sum mor konsultants, en dem gwen luuk at putten wun crossing lorng f’ Bun Pine.”

“Waal dar kaa duu. Wi orlreddi bin try dar b’for. Orl dem toures el wanda semes dem kow krors ar road enni siid dem wunt. En gut no siid wi el tek ‘way dem kar park een Bun Pine so salan el sii dem krossen - ess hard enuf f’ fine siid f’ park now.”

“Dar ent d’ wussest theng. Dar crossing gwen niid full lighting orl dae en ‘ nait, gwen liit up dar road en mek et semes dem street o’er d’ wai.”

“Oh trewly, dar kaa duu. We nor mussa wunt f’ bi semes o’er d’ wai. Oonie thing gwen be deferent es gut noh parken eff dem du dar.”

“Semes a theng, we gwen end up all lit up orl about en gut a crossing noh bohdi gwen yuse. But, dem noh bata den aklan…but oonie kos dem nor arsa aklan wuthen wi bin try before 2016.”

“Oh Soh, es getten wussa en wussa.”

“Es truu ess da bible, so dem tull!”