Soh Dem Tull

So∙Dem∙Tull bin sti-douwn side dar steamer ess. His maet, Lorng-Tongue kum sti-douwn lorng side him en tull, “yu bin ya lorng taim, brud. Yu orl rait?”

“I looking orn dar de-sal plunt.”

“Foot yu doin dar, So? Dar theng nor worken.”

“I thort es mummoo.”

“Dar theng se brek lorng taim.”

“I wonder wuthen happen lorng furret.”

“No plan, dars wuthen happen. Gut noebohdi checken orn et. Gut noe maintenance plan. Noebohdi noe wuthen f’ du en dem nor gut enibohdy ya f’ fix it anywae.”

“Yu mean wi gut wun yu bewt de sal plunt en dems se f’get tu maintain et, so se futuu?”

“Dars rait. Semmes-a-thing, dem el spen plenty orn hiring top wage earners, en machinery en plenty thing wi nor wunt ulla need, but dem kar afford f’ maintain dem theng dem se buy. Es criminal. Car fuut noebohdi el sii wuthen gwen orn ya. Truly, dem kar du!”

“Dar ent orl, myse maet! I bin ya, dem workers frum dar tadda department kar mek yuse of dem worta in dem tanks. Domine houw dry ess.”

“Wuthen yu torken bowt, So?”

“Waal dar water een dem dere tank belong ‘ dar kownsel en dem nor share lorng f’ dem tadda department. Ess kinda straeng, wen dem orl work for dem sullun o’er d’ wai. None so straeng as folk. En I bin ya sum o dem bores se hit saline.”

“So, yu larnen me wi gut wun big drought orn, en wi gut no desal plant en wi hitten salt worta een dem bores. Who dem gut checken dem bores?”

“Semes dar desal plant, myse maet. Gut noebohdi. En sullun een hospital now, sore frum drinken ‘ worta.”

“Es dar frum dems worta ulla dem nort noe wuthen f’ du when dem get dems tank refilled?”

“I carwha, mebbe a bit o both. Wi seem tu be short orn worta education as well. But domine, wi still gut plenty more f’ brek b’for dem se dun.”

“Surely yu stolly brud!”

“Es truu ess da bible, so dem tull!”