So more Dem Tull

So∙Dem∙Tull bin plai skwash en een Leagues karpark. Hi tun tu Du Tull Dah.

“Yu no dar laites nowtis frum kownsil?”

“Dar wun ‘bowt em powa?”

“Yup. Rememba wen dem gut dem Tesla batry endem larna aklan owas powa gwen drop en prys?”

“Dars rait. Wuthen happin dair?”

“Waal semes a theng. Wi still yusen plenti diesel f’ dem powa. En fakt, wii yusen mor.”

“Waa? Fuut?”

“Waal, wii gut tum ani salan yay en dar system kaa kope…speshally een ‘ earli evnen”

“Du tull…”

“Gut plenti salan ya now gut lektrik owen ensted o gas, laik wi bin yusa du.”

“Waa? Da nor mek sens. Fuut dem el du da?”

“Waal, weth opin immigration, en salan muwen ya wunt orl dem theng dem had o’er dair en no wun polisen wuthen gwen orn, wii gut orl sorts o problem I tull yu.”

“En I bet dem newa ewa gwen lowa dems prys wunce se up.”

“Es truu. I tryen f’ work owt how dem el rais dems prys en bakdait et. Dar kant bi legal. I gut wun maet luuken entu ef es legislated charj en eff dem gut powa tu rais et d’ wai dem bin. Orl aklan shuld bi meken shor dem el, ‘for wii pay.”

“So de prais rais mite bii es untenable?”

“Miwurd Du Tull Dah, dars wun biig wurd, semes kolonialism en diktatorship!”

“Ha ha. Es truu, myse maet.”

“Ess true ess da bible…so dem tull!”