So Dem Tull

So∙Dem∙Tull en Norhot Furret hawen a ninni dar tada dai.

“Waal dar barj se dun.”

“Unay. En es wun sad dai f’ aklan.”

“Fuut yu tull dar?”

“Yu nort no dem bring een salan frum awai f’ work em barj?”

“I luuk orn en I sii awas litrij wurkas doun dair.”

“Yu cownt how meni? Kos ooni gut kupel. Dem sey bring een ‘ wurka. Awas salan hat f’ show dem d’ roep en dem gwen tek owa.”

“No, dar kaa bi trew. How mani dem stevidor orn ar shep?”

“Noen. De es d’ end o’ wun o’ aklans lorngist en most unik tradishun. En dem mein hu work for kownsel en wurken de shep nor gwen bi yused gen…until sumthen go daffi en dem gut no chois. I ooni hope gwen happin suun.”

“I bin ya sum salan se gurret en torken bout forty peis o silva.”

“Waal, dem mait tull dar, but dar bigga piktya tull wun deferent stori.”

“Wuthen yu mean So?”

“Waal, semes buyen dem barjs en senden sum o aklan to luuk orn afta dem sey bi et. Dem jes yusen dem wurkas as skaepgot. Effen wi se gurret lorng f’ wun nada, wii nor faiten dem hu bin larna dem wurk ulla walk.”

“Trew dat. Dem orlways tryen f’ devyd en konka. Sad dem so guud at et en wi nort. Yu thort dem hya mein frum ‘way f’ reasin, So?”

“Shor du. Dem nor wunt aklan tu sii wuthen dem brengen ya. Dem sey haid et en dem kontaynas, f’ shor. En dars ooni d’ biginnen. Dem gwen haid orl sorts frum aklan. Wii en beg trubel now.”

“Trew? Wuthen yu thort dem gwen haid?”

“Waal f’ wun theng, dem nor gwen wunt aklan tu no dem fansi lektryk mowa dem se breng en orn ‘ barj nor fet orn eni o dem’s trayla. Trewly, dem jes kaa du.”

“Es dar rait, So? Shorly dem nor mek suj an expeensiv mistaik laik dar?”

“Ess truu ess da bible…so dem tull!”