So Dem Tull

So∙Dem∙Tull setten een his kar lorngsiid Kwiin Elizabeth luukowt wen hes maet Dunna Clii pull up lorng f’ hem.

“Hey So, yu orlrait? Yuse kar se brek?”

“I guud but myse maet Phillip nort.”

“Wuthen yu torken bowt So? Phillip? Huus hem?”

“Dar ailen o’er dair. Hi nor guud en I sohri furret.”

“Waa? Luuk orn myse maet. Phillip newa luuk bata. Sii how griin es, a mor byutiful theng yu ne’er bin sii.”

“Yu mait be el thort daa, but trewth es, hi nor guud at orl. Sii orl dem griin? Waal 80% es Hawaiian Holly en ‘ Olive. Es tekken o’er dar ailen en wii orl setten ya, nor doen a theng bowt et.”

“But I el sii sum pine frum ya.”

“Es truu, gut sum pine, but mos es dem theng wi tryen f’ get rid of ya. En I dar sohri f’ dem whale bud. Dem gut et hard, brud”

“Fuut yu tull dar?”

“Waal, dem yusa lai dems egg een ‘ sarn, but gut dar muj wiid dair, dem getten tangld lornga et. Es a sohri stait o’ afayr, I larnen yu rait now.”

“But So, wii bin ya for lorng taim now bowt how guud dems se kliin up dar ailen.”

“I noh, es orlmost laik wen dem stolli bowt how wii so muj bata orf now. Luuk guud orn d’ surfus, but yu nor hat f’ luuk tuu klos f’ sii d’ trewth.”

“Yu gut wun guud point there So.”

Unai, es truu ess da bible…so dem tull!”