So Dem Tull

So∙Dem∙Tull orn a plane. Gut wun gael setten een dar next seat.

“Yu bin ya tull bout dar kownsel getten sum o’ dem Mistery Shoppas to mek shur wii nor gut an opinyin about wuthen gwen orn o’er ya?”

“Endiid I bin. Truly, I nor thort enisayd gut wun kownsel huu intafeer een wuthen dem buss driwa tull wen dem torken longf’ dem tooress.”

“Unay. En yu no waa? Dem shoppa gwen kors d’ kownsel plentii munny. Dem gwen hat f’ pay f’ dems air fares, dems stay o’er ya, dems meals en eni tours dem go orn.”

“Waa? Yu shor?”

“Dars rayit. Domine wuthen dem du tu get ya, ulla wyal dem ya, gwen bi payd for bi eniboddi hu wunt dem.”

“Waal f’ a kownsel nor gut eni munny dem shor no how f’ spend et.”

“En yu no waa? Ef’n dem wunt f’ luuk orn work ethyk, mebbe dem luuken en d’ rong plais. Jes mebbe….dem should luuk een a defrent direkshun….”

“Dars wuthen I thort…”

“Yuse t’ bi, ef yu gut wun problem weth yuse starf, yu el arsa dem f’ mek shor dem du rait bi yu. Si de wai wii se kum.”

“Unay. Es kyna heawy-harn wen salan kaa vois dems opinyin. Yu thort dem really gwen du et?”

“Ess true ess da bible…so dem tull!”