So Dem Tull

So∙Dem∙Tull writing wun leta gen his aunty.

Dear Aunty Dunna Mahown
Miwurd, plenty theng bin hapin sens yu bin gorn. Gut tu muj f putt een wun leta, but trewly aunt, ef yu nor laff, yu gwen cly f’ aklan.
Wi gut wun hyuj mess down ar dump. Yu nor gwen b'lew how hui hui es. Dem try f hyd et en sum kontayna, but dem kaa get nuff een. Dem tip et up orn ets end en yuse wun krayn f putt mor een. I hoep dem el still leff et wen sey dun.

Dem sey run owt o playsis f putt dar rubbish doun ‘ bak o’ dar dump, so now dem driwen o'er it with wun bulldoza tu mek it kompakt. Es hui hui en stinken. Dem ewen gut tu mein wurken dair jus f' shuut a kaet en ‘ burd. So much f' kleen en green.

Dey bin fiks up dar parken area b'hiin dem shorp. Luuk kwiit guud. Dem shuld bi sey fiks dem sewraj paip unda dair fus, 'for dem putt dem stoen orn tho. Ooni gwen hat f du et after eff dem nort. But dars how et goh. Dem nor do hoel jorb. Dem du a theng, dig et up, fiks et, then redo et. Yu kar b’lewe how muj muni bin waystd ya.

Wi gut a smart meta ya now. Dem el reed yuse powa en sen et o'er d' wai, so dem el bill us f’ awas power. Dems internet nor work tuu guud, so dem hat f' siin up for Starlink, so el wuurk guud. Domine bowt orl aklan putten up with dar tada internet dems se fiks f' awa. Es yusliss.
Dem tull wi bin haw 32 thowsen turres ya, but I shor dem kownten orl dem konsultent, flying wurka en dem mein hu spen orl dems taim flyen ya and dair. Mait bi wi niid f' arsa dem tun rown so wi el tull eff dems draws orn fya!
Dem tull wi es bata orf, but trewly aunty, I kaa sii et.
I hoep yu nor kum bak jus yet, kos orl dem muni bin waysted el mek a salan cly.
Es truu ess da bible…so dem tull!”