So Dem Tull

So∙Dem∙Tull hawen wun koffii weth sum maets.

“Trulii, wat a wiik wii bin haw.”

“Ahh, So Dem Tull, ewrii wiik getten wuusa en wuusa. Wii gut a wiit line, en ‘ yella line en brait laits. Thenk guudness wii gut dem barjis komen tu halp orl aklan ketj up orn orl dem frait.”

“Waal, let mi tull yu, da rent gwen hapin till nekst yair.”

“Wuthen yu torken bout So Dem Tumm?”

“Waal dem fus barjis kariyen plenti theng fur kownsel, but ent f’ aklan.”

“Waa, dark ant bi truu. I bin reed dems publek notiss.”

“Nort orl yu el reed es truu, myse maet. Muus orl dem tu fus barjis gut ooni letl f’ aklan. Dem bi korl et ‘NIRC en frend’s barjis’. Dem nor tek eni mor frait f’ orl dem bisnes owna. Truly ess sad f si d’ wai dem stoppen aklan from hawen a desint wai o laif. Dar frais ‘Wii beta orf’, es wairen vari thin. Enni wai, wii nor gwen git enitheng f aklan until dem barjis se dun for kownsel. Mebbe erli nekst yair.”

“O dar kaa du. Yu shor dars wuthen gwen happen? Yu shor es truu?”

“O, I tull yu, ess true ess da bible…so dem tull!”