So Dem Tull

So∙Dem∙Tull torken longf’ his dorter dar tada nait.

“Wuthen yu bin up tu dis dai, sweetheart?”

“I bin doun ar beaj en up gen dar gym. Dad, yu bin ya bout wuthen hapin at dar gym dar tada wiik?”

“No. Du tull.”

“Waal I ya a sertin sumbodi go f’ trayn dar tada dai en hi sii dar sarjent orlreddi traynen dair.”

“Es frii kuntri myse darlen, orl dem salan el go du ‘ theng.”

“Yu mait bi thort da Dad, but dar salan grarb a moon en wunt dem throw dar sarjent owt!”

“Waa? Wuthen hapin nekst?”

“Waal de salan tull he kaa trayn wen dar sarjent their en hi wunt et teken owt. Dem tull he es payen kustoma en hi gwen stop rait dair”

“Fuut yu thort dar salan wunt hem owt?”

“Mebbe kos hi luuk bata een ‘ short than dar tada fulla?”

“Dar kar bi et.”

“Oh, but hi du Dad. He luuk dar guud, mek orl dem gael pant furret. Eniwai dar tada fulla nor hot f’ sii hem.”

“Mebbe dar tada salan thort kos hi mek hem shef wuns, hi el du et gen en gen. Trewly, I kar wayt tull hi gut no pouwa en tri f’ liw ya. Gwen bi es intresten taim.”

“Yu thort thengs gwen chanj, Dad?”

“Hang et yes. Ess truu ess da bible…so dem tull!”