So Dem Tull

So∙Dem∙Tull setten een hes kar, up siid dar imerjensi bilden es.

Ai Elsiiet pull up lorng siid hem en wyn doun ar windo.

“Wuthen yu doen, myse maet?”

“I luuken orn auwas ayrport en wundren bowt orl dem janj dem gwen mek.”

“Wuthen tu torken bowt, So?”

“Waal yu noh dem gwen putt up a fanse orl abowt, so salan nor goh orn dar strep?”

“I bin ya dar. Kaa fuut dem doen dar. Trewly, nor bin haw eni salan orn dar strep sinse bin ya.”

“Unai. En I bin ya dem gwen putt wun nu terminel up. Dar fulla hu ya bin tull dem gwen hat f’ demolysh dar siid f’ putt up wun nu wun.”

“Truu? Wall, I spose dar plais ess kwite ol’ un en niid sum wurk dun orn.”

“Ess truu. But I bet yu eni theng yu liik, wi gwen lors dar owtsiid aeria en gwen bi orl shet up, semes o’er d’ wai.”

“Du larna dar, shorli kar bi truu!”

“Es truu ess da bible, so dem tull!”