So Dem Tull

So∙Dem∙Tull en his maet Huihui hawin a ninni orn his ‘randa.

“Yu bin ya bowt dem pine doun a toun?”

“No, wuthen gwen orn?”

“Waal, yu rememba Aunt Jemima en how wi plunt dem pine f’ hers 100^th?”

“Kors I du. Wus wun byut dai. How luvli wi bin orlwais du et tu honor aklans ole salan wen dem rej 100!”

“Unai. Wi bin plunt 100 trii f’ plenti salan se gorn hu mek et dar far.”

“Dars rait. So wuthen hapinen?”

“Waal I bin ya dem gwen kut dem pine doun frum dar cenataf lorng tu dem ruen.”

“Es truu I bin notis sum nor luuk dar hot, sens dar swamp se tek o’er.”

“Yu gut dar rait. Pine nor laik ‘ wet fiit en sum o dem kar du.”

“Ef ooni dem el drayn dar stinken mess, sum o dem trii gwen be sayvd”

“Yu mait bi thort dar, but I ya dem gut aprovel f’ tek orl dem doun.”

“Waaa?! I domine dem tek dem wun gut prohblim, but fuut dem nor leaw d’ rest?”

“Waal, I kar work et owt. Eitha dem es duen et kos ef dem trii forl doun, dem miat het salan en dar kownsel gwen bi en straif, ef salan suu dem. Ulla mebbe dem tryen f’ mek et d’ wai was bak een ‘ dai. Mine yu, I thort es letl o’ both. I thort dem nort een a rush f’ drain dem swap kos gwen suit dem f’ tear doun dem trii.”

“Wuthen yu meen, So?”

“Waal dem bissi tryen f’ mek owt dar konvikt setlmint d’ ooni theng bin hapin ya. Trewly, dem gut no kum frum en dem tryen f’ tek awas en syze et wai.”

“O, dars nehsi So, en mek myse iiys likki.”

“Unai, es truu, el mek a salan dar sad. I nor thort dem bin thenk et thru, kos dem ruen gwen bi sufferen frum dar risin damp tu. Miin yu, ef dem tryen tum ek et semes b’for bi tekken dem trii owt, dem gwen hat f’ tek owt dem fanse en dem gaet en dem nehsi letl wuudin inkloshur!”

“Yu no wa So, dars wun ekselent thort!”

“Ess truu ess da bible…so dem tull!”