So Dem Tull

So∙Dem∙Tull jes leaw dar frait meeten en hi run entu Dars Daffii owtsaid.

“Hey yu! Waal, yu es a sait f’ saw ii!”

“Hai So, dar meeten siim tu gu waal.”

“Hmph! I nor thort. Es strainj d’ wai dar emayl kum owt jes b’for dar meeten. Sum o dem bisniss salan ne’er tun up kos dem thort frait was fiksed.”

“Waal es, So. Yu nor ya et?”

“Kuld haw bin betta, effen dem se tull bowt dar utha offa.”

“Wathen yu torken bout, So?”

“Dem PDL kum ya en tork gen dem kownsel mein. Dem offa f’ supply wun boet f as many yair as dar shep el lars, en gwen bi ownd by Norf’k.”

“Truu? Dars a lot o’ frait. Dar mait bi wun bargen. En how muj yu thort dar gwen kors?”

“Waal dem orfa f’ du et for sikstiin milyan.”

“Sikstiin milyan? Dars plenti muni.”

“Es truu, but wii gut plenti valew kos wun shep el last b’tween ten tu fiftiin yair.”

“Dars truu. So wathen dem kownsel du?”

“Dem tull dem wuld stik weth dar shep dem gut.”

“En es wun bargiin?”

“Ef yu thort ‘leven milyan es iwi muny.”

“Waal es less than sikstiin. How lorng dar shep gwen lars?”

“Oonii gwen wurk ya f’ fayv trip. En dem ooni doen dar kos dem wunt f’ shef kownsel frait en dars orl. Arfta dar, dem se dun.”

“Waaa? Hu bin stolly gen yu?

“Ess truu ess da bible…so dem tull!”