So Dem Tull

So∙Dem∙Tull si Duna Stoli owtsiid Kustoma Kair en stop f’ hawe a yarn.

“Wuthen yu up tu, Duna?”

“Waal, I meana pai myse foen bill, but dem tull I kaa du et.”

“Waa?!” Giwen d’ waijes wii payen en dem ayr fayr, I wuld bi se thort dem el tek eni muny dem el git.”

“Waal So, yu miit bi el thort daa, but ‘parintly dems paiment sistim nor wuken rait.”

“Wuthen yu torken bowt? Daa theng es stait o’ th’ art, myse maet.”

“O, yu mek I laff, So! Effen wi pay dem, et nor gwen show orn aklans akownts.”

“Waa?! How lorng dis bin gwen orn?”

“Munths now. I jes glaid I nor gut awto paimint se set up or I gwen lors orl myse muni.”

“Unai, en es grait shaim dem nor larna aklan so wii el stop et. Wen yu thort dem gwen tull aklan bowt de problim. Trewly, wuttawai f’ run a bisnes.”

“Es truu. Sumbohdi larna mi dem bin hakd, but I nort no ef es truu or salan debargenin.”

“Trewly gut so muj gwen orn dem nor larnen aklan. Gut salan geten bills belorng tada salan. Dars wun breej o priwasy. But wi no dem nor gwen larna aklan kos dem el ooni point owt wuthen dem thort wii bin du rong.”

“Truu dat. Es wun sad stait wii een rait now. Miin yu dars wuthen hapin wen dem shef orl awas fynanshels orfshor”

“Unai. Wi gut salan larnen aklan wi nor bin gut demokrasi b‘for 2016. Mek I laff, kos I nort shor wuthen dem thort wii had then. Wi bin gut plenti elektd representativ en now wi gut payd wurkas runen awas ailen.”

“Yu rait dair. Dem nor giw wun rats behiin bowt dii plais ulla orl aklan. Dem jes lynen dems pokit en meken plenti mistaek doen et.”

“Du tork tu lowd. Yu nort alowd f’ lana d’ trewth o de matta en kais salan ya yu.”

“Waa? Wuthen yu orn bowt, So?”

“Waal, orl dem salan larnen dar J.S.C. wuthen gwen orn en sombohdi tull dem se abyus dar panil.”

“No, dar kant bi trew So. I sti dair hoel taim en wus kalm en respektfil.”

“Nort akorden tu dar salan hu tork et up biig orn ar raydio. Dem nor bak et up weth fakts en wen salan arsa dem fuut dem tull et, nuthen hapin. Ewen dar raydio, if yu arsa dem f’ wun kopi, dem tull kar bi dun.”

“Walcum to Norf’k Ailen demokrasi, unai So. Kaa du wi el kwestyun enitheng ulla arsa kwestyuns, ulla larna d’ trewth. En dem go owt o’ dems wai f’ mek owt wi es nehsi en stollyen bowt aklans wai o laif.”

“Unai. Luuk orn dem solar mein een dar aksident. I bin ya dar truk nort ewen rejisterd.”

“Noh! Shorly dar ent truu!”

“Waal, es ooni dem tull, but I bin ya orl dem kownsel wihikel bin git dems rejos chekkd kwik smart arfta dem fiin owt dar truk es illegal.”

“Dar ent guud, So. Gwen opin wun nehsi kan o wurms.”

“Es truu. But yu no wuthen I thenk Dunna?”

“Du tull, myse maet.”

“I rekon mus bi aklan se larna dem wi nort ooni driw wen wii bin ninni, but wi orlso nor yusa rejista awas kar. Dars fuut. Wii gut tuu muj miin powa, I larnen yu rait now!”

“Oh So, yu el sii enitheng funni, en es lukki kos wii gut plenti f’ feil nehsi bowt.”

“Ess truu ess da bible…so dem tull!”