So Dem Tull

So∙Dem∙Tull an Ent∙a∙Theng miit up ‘gein rown ar likka bonn.

“Waal So, luuk laik yu nort no wuthen yu torken bowt when yu larna mii bowt dar kownsel hiren out dem skuuta.”

“Wuthen yu meen, Ent?”

“Yu tull dem gwen hya dem skuuta frum dar Likka Bon, but I nor sii enni dair. Bin kupla wiik now.”

“Ohhh, so yu larnen mii yu thort I stollyen wen I tull yu bowt dem skoota bein ya?”

“No So, I thenk mebbe yu gut dar storri rong. I did tikl furret wen yu tull ef salan se lors dems lisens, dem el hya wun skuuta en tek et f’ dem en domine.”

“Waal, I nor bin sii yu f’ kupla wiik, so yu nor bin ya part tu o’ myse tael.”

“Wuthen yu torken bowt, So? Yu gut mor f’ tull”

“Yu betjii I du. Wuthen yu nort no es dem skuuta nor wurk.”

“Dem sey briik et orlredi? Dar nor tek lorng! Trewly, wuthen gwen orn!?”

“Ha ha, noo, dem nort se briik. Dem tek dem f’wun test driwe, en gess waa?”

“I kaa waa. Kum orn So, spill d’ beins!”

“Es funni ‘un, en orlso kyna sad, I larnen yu rait now. Tun owt dem baik kaa get up dem hill ef salan tek et doun a toun!”

“Nooo?! Shorly yu pullen myse laig. Yu larnen mi nobodi thort bout daa b’for dem by et? Dem jes kaa du!”

“Ess truu ess da bible…so dem tull!”