So Dem Tull

So∙Dem∙Tull at wun miitin, waal es aktyuli orl dem mein up ar RSL hawen a ninni. En yu noh dem mein el tork.

“Wutawai yuse wiik, So?”

“Waal I bin du plenti, en yu noh I bin ya plenti, myse maet.”

“Wuthen yu bin ya?”

“Waal, yorlye noh dar herse? Dem sey senn et orf so el bi maed entu wun o dem lektrik kar.”

“Noh?! Shorly yu stollyen. Dem nor guud!”

“Es truu ess da bible. En dar ent orl. Sumthen hapenen doun ar kownsel, dars f’ shor.”

“Fuut yu tull dar, So?”

“Waal, gut noh hi level manajmint ya, kos dem gut wun ‘merjensi miitin o’er d’ wai. Orl dem starf orn dems wai tu dar meetin orn tewsdai ulla wednesdai. Ooni gut wun ya en dems sey ooni jes bak. Mite bi dars konektid, I kaa waa.”

“Waal, semes a theng. Wi nor gwen fyn owt eff dem hawe dems wai.”

“Unai, es truu. Dem nor realis wi gut wais f’ fyn owt ' theng. Dem thort wi es slow, but awas brayn work fassa den dems, en wi el sii wuthen gwen hapin. Dem siim tu mek wun desishun en tun rown, tull ‘oops! but nor tull ess dems fawlt.’ Es tu lait bi then enihow. En den dem el debargen dars wuthen dem meena du. Pfft!”

“Es truu, dem thort wii es slow en treet aklan daffi. Si how dar mein bin blow up gen orl dem road mein ‘bowt d’ stat o’ dem road. Kaa fuut hi du dar, dem ooni doen es dem bin tol tu du.”

“Unai, es stranja than munni. Dem mek orl dem desishun en wen goh balli up, dem blaem aklan. Mek I laff huw mardun dem ess. Gut no entaklushun.”

“Waal So, dem thort dem batta den awa, but wi bin luu arfta aklans ailen lorng taim en wii nor bin maek dar menni mestaek een orl dar taim. Mekhaes myse maet, ess yuse showt.”

“Es truu ess da bible, so dem tull!”