So Dem Tull

So∙Dem∙Tull gut a muun dis dai. Hi owt wurken een his gardin en torken tu nobohdi en partikula.

“Trewly, I kaa tek et muj lornga. Orl dem thengs dem bin du up ar horspetl mek myse bluud boil.”

“Fus dem tek ‘wai awus horpsetl, mek et wun ajd kair yunit.”

“Then dem bring een so mani admin starf en mek orl dem otha ruum entu offis.”

“Dey redyus orl dem horspetl bed, so wi nor gut nuff. Trewly, wen yu gut lots mor salan liwen ya, fuut yu el du dar?”

“En wi gut f’ mek wun apoyntmint tuu wiik b’for wi niid et, kos wi nor gut nuff dokta.”

“Salan bein medivakd kos wi nor gut enibohdi no wuthen f’ du. Then dem hat f’ pai f’ kum hoem, en f’ dem salan hu go lorngf’ dem.”

“Shor dem el klaym et bak but nor gwen kompensait f’ taim ‘wai frum dems famili en plais f’ stai.”

“En now wi gut salan bein sent orf kos dem niid lorng taim kair. So dem nor gwen bi siid dem lowe en gen dems famili. Mek myse ai likki jes thinken bowt et.”

So∙Dem∙Tull’s gehl opin dems frunt door en yell owt gen hiim. “Oi! Wuthen yu doen gen myse fayvrit roses? Yu bin hak ‘wai at dem orl mornen en now orl ai gut es ‘ stork! Yu kut wun more theng yu mait as waal stop owt dair. Es bolos dis dai en yu gwen ketj numonya!”

“Waal, no yuse I stop owt ya. I gwen end up doun a toun ‘for I gut wun apoyntmint lorngf’ daa horspetl. Es truu ess da bible…so dem tull!”