So Dem Tull

So∙Dem∙Tull etten his lunj orn Bounty Dai en hi tun gen his sista Duyu Wurribowtet.

“Waal, dars wun nada waist o munni thaenks tu aklans kownsel.”

“Wuthen yu torken bowt, So?”

“Waal yu now dem smart miita dem bring o’er ya f’ reed ‘ powa, en how dem kaa wurk kos awas telikomunikashun nor dar guud?”

“I bin ya dar. Es truu, dem kut orf dems own noes tu spite dems fais wen dem nor let aklan joyn dar undawata kabel.”

“Unai. Waal now dem bin putt up dem sola powa panel orl abowt so dem el store dem powa. Dem gwen yuse et f’ dem lektrik kar dem sey by, en kar du.”

“Fuut nort? Gut plentii nuff panel rown, yu mait bi thort dem gut et orl koverd.”

“Waal, semes a theng. Niid f’ dounload wun speshul program so dem el get et started, but aklans internet kar du en dem se pili. I nor thort ewen dar starlink gwen halp get et started.”

“Du yu get mi started orn how dem sey gut dar yu bute internet but orl aklan stuk lorngfa dems lars mestaek.”

“En orl dem smart miita setten dair meken wun hoem f’ orl dem ant. Trewly I kar sii fuut dem still gut ‘ jorb. Ooni es mii, I mait bi el kownt orl dem munni dem bin spen sins dem start, en nor gut muj el du guud.”

“Dars so truu So. Ooni es aklan, dem gwen tull wi gut no ideya.”

“Ess truu ess da bible…so dem tull!”