So Dem Tull

So∙Dem∙Tull sitten up Karskaid Lookout as eff hi waiten f’ sumthen. His maet Du Et Daffii pull up lorngsiid hem.

“Wathen yu waiten for myse maet? Dar shep sey kum en gorn.”

“I ya tull dem bring dem eksplosivs ya orn ar boet f’ tek a rok orf Karskaid en I waiten f’ dem f’ du et.”

“Yu gwen bi waiten lorng taim myse maet.”

“Waa?”

“Waal, dem sey bring dem tuu kontayna ya, fly o’er wun shot firer f’ blow et up en he stoppen ya f’ du et.”

“I ya tull hi ya. Muss bi el kors a fortune hawen a salan stoppen ya, gut akomodashun, hire kar en dem swiit wittles’.

“Es truu, but dars nort d’ hole story.”

“Du tell”

“Waal So, dem sey bring hem ya, but dem nort sey du dems paperwork, so dem kaa fire wun shot doun Karskaid.”

“Wuthen happen tu dem kontayna lorng f’ dem eksplosivs en dem detonators? I noh dem hat f’ bi kept separate. Muss bi muusa 50 meter I ya tull.”

“Waal, dem es stored en different siid on Norf’k, so dem safe. Du yu wurri myse maet.”

“I gut sumthen f’ larna yu, Du Et Daffi. Kos dem nor storen et in a proper fasility, dem hat f’ apply for wun permit every so many days. Gwen kors a fortune gut wun maen orn holiday en permits f’ kiip a theng ya until dems paperwork sey dun. Typikal.”

“Waa?! Dar kar bi rait, surely you degargenen, So?”

“Es truu ess da bible, so dem tull!”