So Dem Tull

So∙Dem∙Tull hawen wun korfee lornga hes maet Nortdis Dai.

“Wuthen yu binn up tu?”

“Waal, I bin doun toun luukin orn dem suff.”

“Waal, dar beet wurken f’ a livin.”

“Dunna nehsi. Nort orl aklan hat f’ work f’ a liwen. Sum o’ aklan gut plenti otha theng f’ du.”

“Laik waa? Maibii yu kuud get wun jorb worken ‘ bar!”

“Fuut I wunt f’ du da?”

“Waal then yu mait be promoted tu wun bilden inspekta. Mine yu, yu ent wun bakpakka.”

“Wuthen yu torken bowt, So?”

“I bin ya tull wun dem bakpakka bin orfard wun jorb as bilden inspekta.”

“Ef hi gut dem kwalifikashun, I kar sii wuthen rong.”

“Endiid hi nor gut. Dem gwen pai f’ hem to go o’er d’ wai en tryn f’ d’ jorb. Dem el pai orl hes ekspensis wyle hi traynen. Den dem gwen pai f’ orl hes ekspensis ya, so he el liwe ya. Ef dem sponsa hem, he el get sitizinship.”

“Es truu? But wii gut plenti salan ya hu orlreddi mait kwalefi.”

“Yu mait bi el thenk dar, but thenk gen. Yu thort dem gwen pars ‘ theng nor rait?”

“Ahh, dars truu. Ef yu wunt f’ get ‘ theng dun, yu niid ‘ salan hu el du wuthen yu wunt. Yu pai outta yuse porkit f’ dem tu liwe en dair.”

“Ahh, myse maet, dars wun fansi tun o’ frais. Enihow, I nor bin sii dem orfa wun ‘ aklan f’ du ‘ theng. Es orlmos laik dem tryen f’ tull wi kar du eni jorb. Dem f’git wi gut kum frum en wi bin wurk ya fir lorng taim.”

“Yu no wuthen I sii dis dai So?”

“Noh. Siid yu bin?”

“I bin doun luuk orn dar kompown en gut a jain krors et.”

“Ah, dars f’ stop dem vandel.”

“Den dem chaynen up een ‘ rong playse, So. Shuud bi jain up dem salan hu nor bin fiks orl dem swamp wata doun a toun. Dar wata underminen dem ruin. The wai dem starnen still orn de problim, gwen bi no ruin leff.”

“Dars truu Nortdis Dai, suun dem fowndashuns el krumbel en gwen bi danjarus f’ dem tures tu luuk orn. Orl dem siin ooni torken bowt dem konvikt histri gwen be waystid”

“Es truu ess d’ bible, So∙Dem∙Tull.”