So Dem Tull

So∙Dem∙Tull setten een his kaa looken semes Logan se kik et. His maet Du Gurret nok orn da windo en So wyn et doun.

“Hey So, yu nor luuken rait. Yu ohkai?”

“I dar frothy. I bin gut a moon hoel dai.”

“Wuthen happin gen yu, So?”

“Yu bin lissen gen ar raydeo yesteddi?”

“Oh So, I nor bin lissen sinse wi se lors VL2NI!”

“Waal, dar pilismein torken orn ar raydeo en hi tork bowt dem mein had dar aksident orn Middlegate Rowd.”

“Yu mean dem solar mein. Miword dar wus wun nehsi buss up.”

“Unai. Dem lukki dem el liw f’ tull d’ tale, dars f’ shor!”

“Es truu, wi senen awas prayer gen dar wun se fly orf en se sor.”

“Waal dar pilismein tull is aklan lokel hu d’ wun f’ blaim.”

“Waa? Kaa bii. Dem wus ooni wun orna rowd. Yu sure dars wuthen hi tull?”

“Es truu. Hi tull dem had dar aksident kos dem lokels larna dem boys wuttawai f’ du a theng.”

“Daa nor mek sens So. Wuthen dem thort wi bin tulla dem?”

“Dem tull awas locals bin larna dem boy es okai f’ starn orn ‘ bak o’ wun yute, ulla driwe, wen salan bin hawe a ninni.”

“No! Daa kaa bi es rait.”

“Wal, dars wuthen hi tull orn ar raydeo. Mek I wunda ef dem hawe wun endukshun wen dem fly o’er en work ya, laik dembin yusa du. Mebbe dey f’get f’ larna dem bowt dar indorsmint f’ dems lisens en gut zero tolarans f’ ninni wen salan orna bak. Mebbe dem nor larna dem wi el ooni putt salan een ‘ bak serten taim o’ th’ dai.”

“I kaa waa. But shorli dem es big enuf f’ no dems own miin wuthen rait ulla rong.”

“Yu mait bi thort da. Myse mum yusa tull ‘Dem es big enuf en ugli enuf tu no wuthen f’ du.’ Ent no diffrens enni siid yu go.”

“Unay. Culd bi wi gut mor powa than wi thort, So. Wi el mek ‘ salan du the rong theng, so ent their risponsibiliti!”

“Es truu. I gwen start a rouma orl aklan yusa go doun ar sliid doun Headstone f’ swim, en sii ef ketch orn.”

“Oh So, I se tikel f’ daa.”

“Ah waal, I gess dar mein nor hat f’ wurri bowt his truk now.”

“Wuthen yu orn bowt now, So?”

“Waal semes a theng. Sumbohdi bin skretj et wile hi gut et een dar kaapark. Dey bin putt up plenti kamra so hi el sii hu doen dem damaj, but I nor thort es a problim now sey buss up guud.”

“Oh So, yu es cussed as hell.”

“Ess truu ess da bible…so dem tull!”