So Dem Tull

So∙Dem∙Tull gut a cuppa en holden wun muffin wen Yu∙no∙war kum up longfa hem.

“Wuthen yu up tu, So?”

“Waal, I luuken orn d’ muffin en thinken orn dem nu chanj kumen ya suun.”

“Chanj? Wuthen yu torken bout?”

“Yu orlredi no dem army kumen ya f’ du dems exasais. Waal dem gwen biild permanint akomodashun f’ dem army salan.”

“No, dar kaa bi truu. Dem tull ooni ya f’ short letl.”

“Waal dar ent truu. Dem meken plais f’ dem tu stai, en dem gwen breng tu helikopta ya permanent.”

“Fuut dem gwen du dar?”

“Giw dem mor skoep f’ patrollen mor area. Dem el travel wun thowsen kilometres frum ya. Nort so eesy wen dem ooni baisd o’er d’ wai.”

“Siid dem gwen stor dem helikopta, So?”

“Es funni theng, rememba wen dem mek dem thik konkreet pad up ar airport en wi orl wunda fuut?”

“Dars rait. Mait bi a truu theng, So.”

“I ya tull dem gwen fix dar hospetl orn dar site.”

“Waal, dar gwen bi a guud theng.”

“Es truu, but ef wi gut army en navy, wisiid dem tures gwen bi allowd f’ go? En, wi gwen ewen haw ‘ tures? En mor important. Dem git a big pai, so dem nor kair ef et kors mor f’ dems wetls ulla survisses. Wi gwen fine aklan kaa afford tu liw ya….mait bi semes dem sey du tu dem salan een Hawaii.”