So Dem Tull

So∙Dem∙Tull luuken orn dar shep owt tu sii. Hi tun tu his maet Haeng Et en tull:

“Yu no dar shep es wun big kar du.”

“Fuut yu tull dar, So?”

“Waal fuss dem tull ar shep kumpani ooni gwen tek fiw dai f’ unlowd dem shep. Si how dar gwen?!”

“Unai, how lorng bin tek so far?”

“I sey lors kownt. En now sey brek.”

“Sey brek?”

“Es truu, dem wayten f’ parts. Kos sey brek es guud un f’ uklan.”

“Wuthen yu torken bowt, So?”

“Waal, kos dem thort ooni gwen tek fiw dai, dar shep kumpani gwen jarj uklan ewry dai sey ya.”

“Waaa? Yu muss bi joken, myse maet.”

“Noh nort. Dem meana yuse et f’ tada work, so dem kwait entitled f’ jarj uklan wuthen dem wunt. I nor thort dem el du dar wen sey brek. Mine yu, now dem sey offload sum kontayna, dem polis el deliva dem part owt ar shep.”

“Yu thort dem el yuse dar new boet?”

“Noh, myse maet. Dar kaa du. Dem wunt et saim dai en dar manatou nort sey leaw dar shed yet. Dem el yuse dem nu jet skis dem polis gut. Trewly, sown mor laik polis work janjen f’ guud.”

“Wuthen yu torken bowt, So?”

“Waal now dem el go fishnen en buzzen orl rown dem sea. Mus bi taim I joyn up waa?”

“Oh, So. Yu es cussed!”

“Es truu ess da bible, so dem tull!”