So Dem Tull

So∙Dem∙Tull luuken orn Bun Pine en shayken hiis haid. Wun cuzin kum up lornga hem en arsa ef hii okay.

“I es fine, but I nort so shor bout myse alien.”

“Wuthen yu torken bowt So?”

“Waal, dem start f’ pul owt orl dem gardins een toun, kos sum beig weigs sey desiid dem wunt f’ putt et orl een ‘ grars ensted. Trewly, nort so lorn ago wii hat f’ putt et een kos torus tull aklan es boren en semes logan se kek et.”

“Waa? Fuut dem du daa?”

“Waal dem es so bizy tryen f’ mek de plais semes Australia, mebbe dars d’ theng.”

“Wuthen yu torken bowt, So?”

“Waal, mebbe es trewly boren o’er d’ wai, en dem wunt f’ mek et laik dar ya, so dem el feeyl laik dem stiil orn dem’s siid. Wii gut a layt, wii gut a path, wii gut a wiit line, now wii gwen haw konkreet en no gardins. En du ewen start mii orn dem naytiv plants dem bin tek owt”

“Mebbe yu rong bowt dar So. Mebbe dem tryen f’ kut kors?”

“I shor yu es adopted myse maet, kos trewly yu kar belew dar. Ef wii kan afford f’ fly dem wiit kola wurkas bak n forth, shorly wi el afford dar pittans f’ meintayn dem garden!”

“Waal gardnas kors muny tu, So!”

“Truu dat. Yu mait bi thort dars wun guud reesen, but dem bin ooni pai hiim bowt wun thousen a munth.”

“Dar ent much, So. ….Shorly yu muss bii stollyen?”

“Es truu. Eni bohdi mayt haw thort es ooni wun lokel doen dar jorb.”

“Ahh, yu mait bi sey het d’ nayl orn d’ haid dere, So.”

“Ess truu ess da bible…so dem tull!”