So Dem Tull

So∙Dem∙Tull torken longa Es Truu en Foodies karpaark.

“Yu bin sii orl dem lait gwen up from Bun Pine gen ar skuul?”

“I bin, en I no yu warn mii gwen hapiin. Yu orlways gut ensiid infamaishun, mebbe I shuud lissiin gen yu mor offen.”

“Es Truu, yu shuud. Yu fiin dem putten dem lait orl de wai up dair kos dem wunt f’ haw wun lit parthwai up gen dar nu horspetal dem gwen biild. Dem dar sneekii yu nort no wuthen tu thenk enimor.”

“Unai. I noh wusnt kos dem starten nait skuul, dars f’ shor.”

“Speeken o’ dem road, yu bin ya d’ laitess?”

“Noh. Du tull.”

“I bin ya dem gwen paynt wite lines orn ‘em road thru Bun Pine, pars ar skuul en doun Stokyaad Road.”

“No! Furr?”

“Waal, wii gwen gut a wite senter line hole waay. I nor bin sii eni sirvai mark, so I kaa huw dem gwen wurk owt wiside dar midel ess. Mebbe dem gwen du et bi luuken orn! Gwen bii dun bi Sundai, so I hoep dem nor go tu wun party fus”

“Dar kaa du.”

“Yu nort no d’ harf o’ et. Some o’ dem road nort wyd nuff f’ mek et legal. Nort ooni dar, but en sum siid, laik Borry’s korna, dar road ent evin siid shuud bi. Ef dem salan hu own dar land wunt, dem el tull dar road hat f’ muuv.”

“Es true?!”

“I nor stollyen. En ef dar road ent waid enuf, en a salan haw wun aksident, gwen open wun huj kan o’ wurms.”

“Wuthen yu torken bowt, So?”

“Waal, ef dar road ent waid enuf, en yu krors dem line, en het nada salan, yu gwen bii libel.”

“Truuli? Ooh dar kaa du!”

“I ent dun yet. Ef yu het nada salan arfta yu krors dar line, en yu wunt, yu kan go tu kort en tull ent yuse fawlt, tull en yuse difens dar road ent legal saiz. Dend ’ fawlt gwen bii on dar Kowncel, nort aklan.”

“Ohh, I nor thort dem bin thenk dar thru! Mebbe yu gut et rorng, So?”

“Ess true ess da bible…so dem tull!”