So Dem Tull

So∙Dem∙Tull en Jes Joken watjen d’ suf. Dem sey sett doun lornga wun rok en torken bout a theng.

“Well So, wuthen yu bin ya laitly?”

“Ahh Jes, yu ooni bin ya harf d’ theng I bin ya, gwen mek yuus haid spin. Yu bin ya bout dar sheppen kompani tork gen dem mein frum a kownsel?”

“No, du tull.”

“Waal, dem offer f’ get wun shep f’ aklan, fit et owt en wi by et for $16 milyan. D’ bass theng bowt dems offa, es gwen bilorng tu Norf’k.”

“Dars a lot o’ munni. But yu el sii wy es a guud theng. Dar gwen mek aklan indipendent en wi kan mek shor es ooni f’ aklan.”

“Trew dat.”

“Wuthen dem mein tull?”

“Dem tull, noa thenk yu. Wi suuna spen awas munni orn faiv barjs.”

“How muj dar korsten So?”

“Leven milyan!”

“Waal I spos es guud theng wi gut dem barjs.”

“Trewly, yu nor lessenen. Kors leven milyan en den wi gut nuthen wen dem faiv sey dun.”

“Waa?! Dar kaa du!”

“En d’ laites theng I bin ya, wen orl dem akomodashun gwen sall, dar owna mek wun deel. Dar prys gu doun en exhanj f’ meken shor dar sheppen kumpani gut wun monopoli.”

“Oh dair, So, I thenken dars fuut es so hard f’ get dar tada shep orf ’ groun.”

“Du tork Daffy Jes, yu no as waal as enibodi, shep go eena water, nort orna groun. Ess truu ess da bible…so dem tull!”