So Dem Tull

So∙Dem∙Tull luuken orn dar bysentenyal senta wen his maet Gwen Doun kum up lornga hem.

“Wuthen yu luuken orn myse maet?”

“I luuken eff I el sii smoke.”

“Waaa?! Es dar plais orn fya?”

“No nort. Dem bin wayst plenti muny en I wunda eff I el sii et smoken.”

“Wuthen gwen orn now, So?”

“Waal, gut wun mein ya mekken wun leff f’ dayr.”

“Waa? Siid dar leff gwen?”

“So dem nor hat f’ goh up dem stayr.”

“But So, ess ooni wun set o’ stayr. Shorli dem el kliim dar?”

“Yu mait bi thort da myse maet, but gwen putt a leff een dayr. En nort ooni dar, dem mekken et biig nuff el tek a stretja!”

“Fuut dem niid f du dar, So. Es ooni wun flyt o stayr. En nor gut tuu menni wurken up yorna.”

“Unay. Mebbe es f deferent reesun.”

“Wuthen yu thenkin So?”

“Miit bi f’ wen dem salan kum o’er ya f’ du dar awdit. Dem gwen shorli faint wen dem sii orl dem muny bin spent orn ‘ theng wi nor niid.

“Hah! I newa thenk orn da, So. Yu gut et!”

“Es truu ess da bible, so dem tull!”