So Dem Tull

So∙Dem∙Tull visiten his grannie, Aigwenflorget, orn dar randa. Dem tu torken bowt ole dais en a theng dem bin du.

“Oh, yu rememba dem klorset?”

“I shorli du. Hawen f’ git up een a nait en tek wun torj doun ar bak gardin, en es fraydi un.”

“Ah poorii. Yu nort no wuthen yu torken bowt. Wen I wus letl salan, wi hat f’ yuse a kandl. Wen dar wind se ketj it, yu een a dark. Now dars fraydi!”

“En stinken!”

“Dem red bak spyda nor mine dem smaal.”

“Unai. I bin yusa luuk orl rown ‘for I set doun, afta I ya bowt Fletj en dar biet orn hes pote.”

“Was nehsi wun tu. Tek lorng taim f’ heal.”

“Es truu, he kaa set doun f’ lorng taim, en orl aklan yusa bang et…yu no, tu halp with dem healen.”

“Oh So, yu wus cussiid den en yu nort se chaynj.”

“Waal, thenk guudnis wi gut endoor plummen nowdays.”

“Es truu. I nor hat f’ wurry bowt dem spyder orn ar seet.”

“Ooni theng ess, wi gut defrent problim now.”

“Wuthen yu torken bowt boy?”

“Waal, I bin ya wi gut a griin frorg ya now.”

“Oh, dem nor gwen lars lorng, dem nais mein et byo sekuriti gwen fix dar.”

“Waal yu mait bii el thenk dar, Grannie, but dem bin no bowt et f’ lorng taim en dem waiten f’ sii ef gwen bi a pest ulla nort.”

“Waaaa? But ef dem el du daa, gwen bi tu lait en wi gwen gut tuu menni and kaa get rid o’ it, like dem cussed gecko.”

“Es truu grannie. I kaa belew dem buryen dems haid een a sand. Wii orl no dem griin frorg bin korse plenti akksident o’ yonna.”

“Wuthen yu torken bowt So?”

“Waal dem griin frorg laik ‘ set under dar rim!”

“Dunna tork en riddl boi. Wuthen yu mean?”

“Waal dem nor mine endoor plummen, so dem kum een ‘ howse en set unda dar seet. Salan set doun en ya et korlen owt, ulla feel et with dem’s pote, en fly orf dar klorset. Es danjerus kreetya, I larnen yu rait now.”

“Oh, dar ent truu, yu must be stollyen!”

“Es truu ess d’ bible, so dem tull.”