So Dem Tull

So∙Dem∙Tull luuken orn dar foen buk wen his maet Graba Laig walk en.

“Wuthen yu doen, So?”

“I luuken up dar imerjinsy foen numba, myse maet.”

“Fuut yu doen dar?”

“Waal, yu noh dem bin by wun manatou en wun poliss boet f’ searj en reskew?”

“Es truu, I bin sii et. Es a byuti.”

“Dem spen dar muj munni, yu thort dem el by a theng gut mor powa f’ d’ jorb.”

“Wuthen yu torken bowt, So?”

“Waal, dar theng gwen stop up dar EMNI senta.”

“Dars a guud theng nort?”

“Yu mait bi el thort dar but gut a top spiid o’ 30km en ess lorng wai frum doun a toun.”

“Wuthen dar gut tu du weth yu luuken up dems foen numba?”

“Waal, I thort I mait goh fishnen morla en I thort ef I larna dem now wuthen I gwen du, dem mait bi thair bi d’ taim I niid mor fyul f’ myse tinny.”

“So, yu es kwait mard un, yu noh et?!”

“Es truu ess da bible, so dem tull!”