So Dem Tull

So∙Dem∙Tull starnen owtsiid ar pos offis shayken hes haid wen hes maet Dularnamidar walk up gen hem.

“Wuthen gwen orn myse maet? You luuk semes yu sey lors yuse mine.”

“I jes bin een ar pos offis kos I nor bin get myse mail.”

“Waal, yu noh So, sumtyms dem theng tek lorng tym f’ get ya.”

“Bin lorng tym myse maet en I thort sey gorn west.”

“Wuthen dem tull?

“Dem nort noh, myse maet. I arsa dem wuts th’ goh f’ Australia Post en dem tull dem nort part o’ dem enni mor, so kaa waa.”

“Waa? Wuthen happinen dayr?”

“Waal, semes a theng. Dem mos laikli getten dar mani komplaynt ‘bowt dem mail nort sey tun up, dem sey sik o it. Dem sey tek tu korlen it wun lokel pos offis, so ent part o’ dem o’er dair.”

“Waa? Dar kaa bi trew. Dem el du daa? Dar sound tu daffi f’ wurds.”

“Es truu ess da bible, so dem tull!”