So Dem Tull

So∙Dem∙Tull seten orn wun Lions siit bi dar bond stor wen hes maet Ay Entapoet stop tork lorng f’ hem.

“Myse wurd, yu nor luuk waal. Yu ohkay myse maet.”

“Oh, I orlrait.”

“Dunna stolli So. Wuthen rorng?”

“I bin huwa huwa plenti f’ wun wiik now. I kaa b’lewe gut eni mor f’ goh.”

“Fut yu newa go up ar hospetl?”

“Waal, trewly I gut a nor wunt.”

“But So, dem es eksperts. Dem el halp yu.”

“I gut tuu problem weth dar hospetl.”

“Wats dar, myse maet?”

“Waal, I bin ya tull sum salan bin luuk orn dem fiyl en den larna evribohdi yuse bisnis.”

“Dar kaa bi truu So. Dem hat f’ respect auwas privacy.”

“Yu mait bi el thort dar, but I bin ya bowt salans bisnis I nor wunt f’ ya. En I nor wunt evribohdi talken bowt myse poet.”

“I shor moes salan nor muusa wunt f’ tork lorga yuse poet myse maet. Wuthen als gwen orn?”

“Waal, bak een ‘ dai, wen salan se iti, wi luuk afta dem ya. Orl auwas famli du wuthen wi el f’ halp.”

“Dars truu. Wi dar lukki f’ li ween d’ komuniti.”

“Waal dars se chanj now. I nor gwen up ar hospetl. Ef I gwen miit myse maika, gwen bi ya, nort eni siid als”

“Wuthen yu torken bowt So?”

“Waal dem bin send orf auwas salan se ole ulla iti, o’er d’ wai. Domine eff dem gut lorng taim f’ go ulla dem noh gut short letl. Dem jes sen dem ‘wai. Wi nor gut nuff beds, but dem nor siim tu kair wen salan nor wunt f’ leaw Norf’k so dem el daid ya. En den orl dems famli kaa ‘ford f’ go sii dem ulla tull guudbi. Es wun sad stait o afayar”

“Noh, dar kaa bi es truu!’

“Es truu ess da bible, darlen, so dem tull!”