So Dem Tull

So∙Dem∙Tull torken up ar Leagues Club longf’ his maet Yu Johkin.

“Es yor tun f’ by a roun, So.”

“I shor ent, but domiin. Miin yu, effen yu by et, I el larna yu wun stori bowt beir.”

“Yu orlways du dar, So…en dars fuut I orlways byen ‘ roun.”

“Waal, I domiin I nor larna yu.”

“Stidii orn myse maet, gut wun kumen. Wuthen gwen orn?”

“Waal, I bin ya wun o dem larna dem barj salan dem niid dems alkohol for dar bon mor dan dem tada salan. Orl dem tada alcohol git orf-lowded en ooni dem likker bon get dems.”

“Ahh waal So, dar ent a bad theng. Wi niid f keep dar kownsel gwen with dem sales. Mekken ‘ muny f’ kiip salan imployd. Du wi forget dems muny haplen pai f’ orl dem’s wajis.”

“Yu no waa? Dars wun guud point, but gut mor tu de stori. Orl dem tada salan need dems frait, so dar kownsel fly et een f’ dem.”

“Trewly, dars wun guud diid!”

“Yu mait be thort dar myse maet, but kors plenti thowsen dola f’ get et ya, so I thort dem bin spend muj mor den dem gwen mek, domiin how muj wun slab o beir kors.”

“I nor shor I wunt f’ no how muj.”

“Waal yu mait bi el pai ‘ salan’s waij f’ yair f’ d’ saim kors. Dars orl I gwen tull…bluu kolar wurka, myn yu.”

“Trewly So, dars nort wun iwi amownt. Mek I wunda siid awas muny gwen. Miin yu, at least dem el mek ‘ muny orn dem alkohol dem gut.”

“Unai, but den yu gut dar tada mein giwen owt likka import lisens, so dem gwen lors dem’s bass sors o’ inkum. Den wuthen gwen hapin myse maet?”

“Dunna Stolli. Dar kant be es truu. Nor mek sens”

“Ess truu ess da bible…so dem tull!”