So Dem Tull

So∙Dem∙Tull en his maet setten orn ar lions seet nekst tu dar Liquor Bond watchen dem mein wurken orn ‘ rowd.

“Yu ya bowt dem tu mein kum ya f’ teej aklan how f’ fiks em rowd?”

“Du mek ai larf, enn up wus awus salan teej dem how f’ du et. So dar kownsel pai f’ dems tikit, akomodashun, fuud en wun vehikel en dem nort no wuthen f’ du. Tek thrii taim f’ dem tu du dar bit jes dair, en stil kaa du. En I kaa fuut dem newa go praktis orn a siid gut mor f’ du.”

“Mebbe dem thort dem el show orf en orl aklan el sii awus munni wurken”

“Trewly, mor laik muny gorn t’ waste. Mebbe dem salan kum frum dar kownsel een ipswij.”

“Fuut yu tull dar?”

“Waal wi bin haw plenti salan from dar siid. Yu rekorl dar lars builden enspekta hu nor laik ‘ heits? Hi kum frum sumsiid dair, en tun owt hi wus wun maet ulla sumthen en hi gut a jorb as janita nort lorng afta.”

“Es truu?”

“I nor gwen stolly yu. Hi ent d’ ooni wun wi bin gut ya. Rait now wi gut wun builden enspekta teajen wun fly een fly owt how f’ du d’ jorb. Gess wisiid hi frum?”

“Miword dar mikstur dem putt orn ar rowd es stinken.”

“I kaa fuut dem newa du et at niit wen gut no salan ‘bowt, semes dem du siid dem kum frum. En I glad ent me smaalin dem fumes kos I bet es nehsi un. I kinda teken bak tho with dems lak o saefti meashur”

“Wuthen yu torken bout, So?”

“Waal, bak siid dem fulla kum frum, dem gut a sign orn ‘ rowd larnen salan f’ slow doun ulla luuk owt. En dem wair reflektiv cloth so dem nor get hit bi enni kaa. Dem el ewen get dem poleis car f’ sit et d’ en, so salan el sii gut sumthen gwen orn. Ent riit f’ putt ‘ salan owt een ‘ dark gut no protekshun.”

“Yu riit dair. I muusa het wun o dem wurka, en I nort ewen gwen fars. Liik I tull, I nor laik d’ smaal o dar tar mix.”

“I bin wurri bowt myse kaa tu. Dar spray gun gut no shield en as I driww pars, dar wind pik up. Trewly, ef myse paent jorb orn myse kar kaa du, I gwen sen wun bill tu dar kownsel.”

“Yu thort dem gwen tek enni notis So?”

“Nort unless I offa tu pai wun fly een fly owt kum owa ya larna dem wuttawai f’ fiks et.”

“Oh dear So, yu mait bi riit. Dem newa ewa gwen lissen tu aklan ewin tho wi gut mor kum frum en komen sens. Dem el du wuthen dem wunt en spen up orl dem takspayas muny on a theng wi nor muusa niid.”

Ess truu ess da bible…so dem tull!”