So Dem Tull

So∙Dem∙Tull tekken his dorg f’ a walk up Kwiin Elizabeth luukowt dar tada dai. Hi sii his maet Dunna Mahone worken dar tada wai.

“Wisiid yu gwen, myse maet?”

“I orn myse wai tu KCI f’ get myse tyr fiksd. I se buss up een wun o dem pot-hole doun dere. I shuud sen ar bill to dar kownsel”

“How yu buss up yus tyr?”

“Waal, I bin yuusa luuk owt f’ dem wiit lyn orn a rowd, but syns dem bin putt a rok een, I kaa sii et.”

“Waal, ef dem se putt a rok een, yu nor need dem wiit sirkel.”

“Yu mait thenk dar, but we bin haw ‘ rayn, en dem rok sey wash owt. Wen et wash owt, et ly orn dar owtsiid en yu kaa sii dem wiit lyn.”

“Yu thenk dem mein putt dem wiit lyn so dem el sii wisiid f’ putt em rok?”

“I nor thort. Yu no auwas kownsel gut no muny f’ fix em rowd ulla wiid dem gardin?”

“I bin ya dar. So hu fiksin ‘em rowd?”

“Dem sey kontrakt et owt. Es guud un f’ sii auwas salan getten sum muny, but korsten mor than ewa f’ du dem rowd! Trewly, I kaa sii dems lojik.”

“I sii dem se gut wun nu swiipa, mus bi sey kum orf dar barj.”

“Es truu. En dem se swiip rown em shops en pick up ‘em roks f’ put een dem pot hoel.”

“Shorly yu stolyen?”

“Es truu, wii borrowen from Piita f’ fiks Porl?”

“Priity muj. En trewly dem kaa du. Wen dem runnen roun tekken ‘ stoen frum salan’s gardins en lan so dem el mek a rok, yu mait thenk dem gwen mek shor nor wash ‘wey. Wii nor gut nuf f’ wayst et kos wii nor gut a kwarri”

“Ess truu ess da bible…so dem tull!”