So Dem Tull

So∙Dem∙Tull setten up watjin dem letl salan playen league. Hi tun tu DuYu Tull-Dar.

“I sii dar barj nor worken dis dai.”

“Unai. Dem tull dar suff tu nehsi.”

“Pourri. Dar barj bin ya kupel dai en dar suff bin es guud un. Gut mor tu dar stolli, I larnen yu rait now.”

“Wuthen yu torken bowt, So?!”

“Waal, fuss theng es dar barj newa bring both dems forkleff. Den dar biig wiit barj gut wun elektrik problem.”

“Waa?! Wuthen happin?”

“Waal sumbohdi putt dem batry leed orn daffi en fri dem elektriks. Now dem hat f’pai dar mein hu mek em barj kum oér ya fiks et.”

“Waal dar gwen kors a bom.”

“Es truu. Nada theng es dem hu thenk dem no bata than aklan ooni wunt f’wurk dar shep een Kaskayd, nort doun-a-toun, en wi no dar kar du.”

“Unai. Semes a theng. Yu kar kownt orn dar suff ooni doun dair. I wurri f’dem mein ef dem try f’tek wun forkleff owt tu dar barj. Dairs wun guud reasin wi nor yusa du dar.”

“Wutts dar?”

“Bak een ‘ dai, dem tri f’tek wun owt en gut wun pallit o beya orn dar liita. Dar suff kum up en dar wind kum nehsi en dar forkleff sheff orl ‘bowt. Dem fork buss up dar beya en mussa hiit wun dem mein. Wus fraidi, en dem tull no more forkleff een a liita. Hoep dem el thenk orn dar.”

“Unai, kar du we lors enni salan kos dem hat f’ lissen to dem salan gut no kum frum.”

“Trewly, gut mor en mor salan kar wuthen f’du larmen aklan wutawai f’du orl dem then wi bin du for lorng taim. Ess truu ess da bible…so dem tull!”