So Dem Tull

So∙Dem∙Tull setten orn ar pya watjen dem wurken ‘ shep. Hes maet Swinget Daffi kum set doun gen hem.

“Yu luuk laik yu doen plenti thenken myse maet.”

“I watjen orl dem kontayna biyen loadid orn ar shep. Trewly, jes kar du.”

“Unay, but wi getten dem kontayna orf ya, en dars a guud theng.”

“Yu mait bi el thort dar, but semes a theng, fuut wi senden so muj orf wen wi kuld bi sey bunn et?”

“Waal dem nor wunt aklan f’ bunn a theng enimor.”

“Wi gut wun expensiv gas bunna, but wi kar yuse et f’ bun a theng. En wi sheffen aklans rubbish o’er d’ wai en mekken et dems prorblim. How wi korl dar ‘cliin en griin’?”

“I kaa waa, So. Semes a theng. Wi bin try f’ du the rait theng, but en trewth wi jes mekken ‘ mess sumsiid als.”

“Outta site, outta miin, eh So?”

“Dars rait. I spekt dars fuut dem tekken em PFAS o’er d’ wai orn ‘ kwyet, wyl wi nor luuken.”

“Wuthen yu torken bowt, So?”

”Waal, dem biig silinda gut orl dem kontaminashun lorng f’ dem. Mebbe dem thort ef dem tek et wai, no bohdi gwen kik up ‘ fuss bowt dem’s helth. En ef dem du, wyars d’ evidens?”

“Oh So, dar kar du. Shorly dar ent why.”

“Es truu ess da bible, so dem tull!”