So Dem Tull

So∙Dem∙Tull an Ent∙a∙Theng at ar airport dar tada dai. Dem bin gut frait kum een en gwen pik et up.

“Hey So, yu ya bowt dem ‘lektrik baik dar kownsel bin breng o’er ya?”

“Kors I bin, I wus d’ wun larna yu bowt et.”

“Yu bin ya wuthen dem ya fer?”

“Semes a theng, es nada wun o’ Nanie’s idya. Dem thort dem gwen hya dem owt tu dem tures. Dem tures el hya et frum dar likka bon.”

“So, yu larnen mi dar kownsel tull orl aklan dem nor wunt f’ du ‘ theng nort kownsel jorb, but dem el hya owt ‘ baik gen dem tures?”

“Es truu, en dem thort dem nor hat f’ rejista dem baik ulla mek shor dem tures gut a licens.”

“Waal dar mek sens, dem es ‘lektrik en probly nor dar powafool.”

“Yu mait bi thort dar, but dem ‘lektrik baik stil gut ‘ horspowa. En nort ooni dar, wuthen hapin ef wun tures haw wun aksident?”

“Fuut dar gwen bi es problem? Trewly So, yu worri tu muj.”

“Ef dem nor rejista dem, dem gut no insurans, no publik liability en dem tures el suu et.”

“Waal, dar newa krors myse mine, but yu rait, So. En dem tures orlreddi gut sum kaa driw ‘ kar, en I nor thort dem orl gwen be profishint baik ridas.”

Es truu. En wuthen hapin ef dem get sor frum hitten ‘ kar. Mor medivak. En yu no wuthen als kuud happin Ent?”

“No So, I gut no idya.”

“’Imagine ef dem hit a pothole een Rooty Hill Road, dem mait bi el disapeyr orltagada. Wi gwen hat f’ sen owt wun serj parti”

“Oh So, yu mek I laff, I se tikel f’ dar.”

Ess truu ess da bible…so dem tull!”