So Dem Tull

So∙Dem∙Tull luuken orn 'Kaadu Karpark' en hes maet dryw by. Hi luuk orn, pull ova en win doun ar windo.

“Yu orlrait myse maet?”

“I setten ya thenken orn how salan mek a theng en nor luuk orn dar biig piktya.”

“Wuthen yu torken bowt, So?”

“Waal, luuk orn orl dem gardin dem sey plunt. Fuut dem du dar? Wi bowt f’ goh entu wun nehsi drowt. Mek a salan wunda wuthen dem thenken?”

“Es truu So, I nor thort dem doen muj thenken at orl. Yu ooni hat f’ luuk orn orl dem theng dem bin du these pars yairs f’ noh thenken ent dems strong point.”

“Es truu ess da bible, so dem tull!”