So Dem Tull

So∙Dem∙Tull nok orn ‘ door gut *Dr Kaa Waa* sign orn.

“Kum een a hows.”

So∙Dem∙Tull oppin ar door en wolk een.

“Mornen, So! I nor bin sii yu f’ lorng taim. Wuthen gwen orn?”

“I jes kaa sii ‘ theng as kleer as I yusa du dok, en I kaa wuthen f’ du.”

“Waal, yu se kum tu th’ rait plais.”

“Es trew, I gut plenti orn myse miin, en I wonda ef I el tork longf’ yu brudda? I kaa sliip. I gut so muj f’ thenk ‘bowt en driwen mi daffi.”

“Kum set doun ya, en larna mi orl yu wunt.”

“I kaa wisiid f’ start, so I gwen jes tull enitheng kum entu myse haid.”

“Dars wun guud plais f’ start, myse maet.”

“I bin luuk orl rown, en I luuk orn dem wiit line en I thort gut mor tu dem bein ya. I bin ya wii gwen get ‘ beg truk ya, en dem wiit line es so dem, en aklan, stai orn awas own siid.”

“I bin si dem new sign gu up f’ warn skuul krossen, wen dem wuns wii gut es stil guud un. I kaa fuut dem sey putt up ‘ sign f’ larna aklan gut a road when wi el si dem road sign. Mek I thenk mebbe dem big truk gwen need f’ no siid dem driwen. Fuut dem putt blak paynt rown dem wiit line, ef ent tu mek et starn owt lorng wai. En dem sign es glow een ‘ dark. Wii nor gut skuul ulla krosen eena nait!”

“I luuk orn dem laits orl d’ wai thru toun en I wunda ef es f’ tures, ulla so dem biig truks nor gwen run salan o’er.”

“I si dem widnen ar road doun roun dar runway, en I wunda fuut dem ooni doen ‘ lorng dair. Mebbe es so dem el paynt d’ meddel? Afta dem sey putt doun a wiit line, I piken dem gwen putt up dar spiid limit, kos a biig truk nor laik ‘ gu 30 ulla 50km.”

“I bin ya dar aussie navy bin mek wun ridikulus orfa tu by dar land looken o’er Kaskaid. Kaa bii dem wunt et f’ luukowt. Gut tu bii sum guud reasen. Dem gwen kwarri? Ulla dem gwen mek wun kamp up yenna?”

“I no dem aussie army kumen o’er ya suun. Wuthen gwen hapiin out Anson, wyil dem ya? Dem beg truk? Wij wai dem gwen bi karten ‘ rok?”

“I bin sii wun map gut Kaskaid as wun navy bais weth wun brekwata orl along, so dem el shef a theng orn en orf, en nor niid aklan f’ halp. En I bin ya dar ‘ministrayta tull dars his preferrd plais f’ unload ‘ shep.”

“Si how dem bin pull up ‘ gardin? Salan thort es f’ show dar minister how wi semes wun aussie suberb. Wot ef es so dem truk nor het ‘ salan wen dem krorsen, waa?”

“En, dar laytes grant f’ get mor kinsultent to luuk orn aklan’s roads? Fuut dem doen dar? Wi orl no dem roads es en niid o’ repayr. Wi nor niid sumbodi kum ya f’ larna aklan dar. Kuud bi dem gwen tull auwas roads tuu nasey, en wi niid ‘ nu road, en mebbe wun gwen start longa Kaskaid en go strait to Anson…”

“Dem tull salan bin sirvay dar road up gen Palm Glen en gwen bi muj wida…fuut dars a theng f’ dem f’ du? Es dar part o’ dar strait road?”

“I miit wun fulla dar tada dai. Hii larna mi hi ya f’ rekonoyta, en hi work f’ dem myns, driwen wun biig truk. Trewly dok, myse haid so ful o’ thort, es spinnen en I kaa du no mor. Wuthen yu thort I el du?”

“Waal So, I undastarn fuut yu feelen d’ wai, but yu no I es eye dokta, rait?”

“Yea, I no dar, but dar haid dokta tuu busi torken f’ plenti salan en nor gut taim f’ si me f' wun munth. I kaa wayt dar lorng. Yu nor gut wun wayten list. Dem tull I el sii yu strait wai.”

“Waa? Dars fuut yu ya?”

“Ess truu ess da bible…so dem tull!”