So Dem Tull

So∙Dem∙Tull setten doun wotchen sum rayn klowd comen een. Hi tun tu hes maet Kaa-Watawai F’Du-et en sii.

“Waal, semes a theng, I kaa git myse forkleff lisens renuud.”

“Wuthen yu torken bowt, So? Dar kownsel bin larna aklan en February Saefwurk nor luuken afta aklan enni mor, but wi el yuse dem nuu salan een Kwiinsland.”

“Ahh pourri. Da nor gwen hapin”

“Fuut nor gwen hapin, So?”

“Waal, tun owt wen dem jange frum NSW to dar tada kumpani, dem nor du dems hoemwurk”

“Fuut nort?”

“Waal, I jes bin git wun emayl frum dem Comcare salan and dem sey tull dem kaa du et.”

“Dem kaa du et? Wuthen gwen orn, So?”

“Dem tull Norf’k Ailen ent elijibel f’ enni hi-risk wurk lisens”

“Waaa? How dar hapin? Orl aklan bin yuse ‘ forkleff f’ yairs.”

“Unai, mek I wunda how wi bin get ‘long ‘for 2016.”

“Wi bin du orl kina theng o’er ya sins 1856, en now dem gut d’ hyde f’ tull aklan wi kaa du. Es wun insult tu aklans kum frum.”

“Lukki wi no batta den dem. Afta orl, wi nor bin mek as mani kossly mestakes as dem en short letl. Ess truu ess da bible…so dem tull!”