So Dem Tull - Part 2

So∙Dem∙Tull readen dar paepa dis mornen en mumblen gen hisself.

“Wuthen yu torken bout, maen? I kaa ya yu.”

“I readen dar fayr ban notis, en trewly yu kaa belew et.”

“Belew waa? Yu nor meken sens.”

“Waal dar fayr ban start 14 January. Wi bin yusa start et en December, kos dars wen es hot un.”

“Waal, wi bin gut plenti rayn.”

“Ulla mebbe wi wayten til sum salan sey dun kleeren dems land, en dars wy starten so layt… En, I larnen yu, sum salan sey dodge wun bulit kos dem nor gwen get a fayn, wen dem bin bun a theng en se gorn daffi”

“Truu dat. Wi bin lukki so far.”

“Mek I laff wen I read aklan niid f’ tek akshun so fayr nor spread. Es laik throwen dar baebi owt weth dems barth wata. Es tu layt now f’ dem salan orlredi bin gut damaj. En yu fyn dem larnen aklan f’ trim a theng, so sum salan el finish wuthen dem doen ‘fore dar ban start”

Waal, es good un dem larnen aklan wuthen f’ du.”

“Yu thort? How meni beg bush fayr wi bin haw ya syns dem sey dunna bun doun Headstone? En how meni wi bin haw ‘for dar? Trewly ent awa doin daffi f’ fayr! En I lowe de bit… ‘preparen wun hoes el reej rown yuse hoem’. Mebbe sum salan niid f’ hawe wun gu orl d’ wai tu dar bowndri f’ halp dems nayba wen dems fayr wunt f’ viset.”

“Trewly So, yu es sinnik.”

“ Ess truu ess da bible…so dem tull!”