So Dem Tull - Part 1

So∙Dem∙Tull en Gutta Hilli torken dar tada dai.

“Mii hang, et wus windi dar tada dai. I el beerli starn up strait.”

“Dunna stolli, yu bin et plenti an drink ‘ ninni, yu fine ent dar wind mek yu week.”

“Dars nehsy, So. I gut feelens yu no. Waal, anyhou, yu bin sii orl dem aktiviti owt Rocky Point? Trewly, es laik wun smoekhows owt dair sum dais.”

“Yubet. I ya tull es therd taim hi bin lait a fayr. Nor kair tu larna his naybors ulla enni wun als. Trewly, yu mait thort gut sum rule f’ sum en nort othas.”

“Yu bin tull dar before, So.”

“Waal, semes a theng. Dem tryen f’ breng een a fayr purmet en fines, but ent aklan laiten ‘ fayr en kawsen trubl. En wuthen happen gen dem fayr restrikshun wi bin gut orl dem tada yair?”

“I bin ya dem tryen f’ du dar. Wi bin haw menni fayr, So?”

“Wi bin yusa wen dem bunnen ‘ theng doun Headstone. Mebbe 8 een a munth, but syns dars sey dun, wi nor bin gut enni f’ lorng taim.”

“Wuthen hapin dar tada dai?”

“Waal, semes a theng. Sum salan nort no dem pine es komuniti trii. Dems ruuts kris kros orl abowt. Dem set fayr tu wun ole stump en dem flaim kum owt lornga nada pine.”

“Dar theng bun muj?”

“Waal, kyna fraidi kos start bunnen doun dems naybors, en tu danjerus f’ dem fyries f’ du muj.”

“Dar ent guud. Wuthen hapin nekst?”

“Waal, dem hat f’ korl dem fyries bak, kos nor luuk guud.”

“Siid dar fyr layta?”

“Waal hi tull hi luuken orn, but hi se sly, liit et, en se gorn.’

“Waa? Dar kaa bi truu!”

“Gut mor tu d’ storri do. Dem fyries hat f’ gu owt nekst dai, kos dar salan chippen a theng rait nekst tu siid dar trunk se ketch fayr. En gess wuthen happin nekst?”

“I kaa waa.”

“Gutt wun nada fayr f dem f’ luuk orn.”

“Dar kaa bi rayt. Evrybodi no bata den dar!”

“Waal, yu mait bi thort dar, but sum salan thort dem no bata den awa. Wi lukki nor tun bad kos wi nor gut wun helikpta ya f’ halp ef go nehsy, kaa git ya f’ wun lorng lorng taim.”

“Dem puur fyries, gut no relaks orn wun publik holydai. Yu thort dar salan gwen get een straif f’ wuthen dems sey dun?”

“Waal, dars wuthen yu mait thenk, but as I orlwais tull, gut wun rul f’ aklan en wun f’ dar tada salan…. Ess truu ess da bible…so dem tull!”