So Dem Tull - lektrik baik en dem se git ya dis wiik

So∙Dem∙Tull doen his kresmes shopen wen he run entu Guta Muun.

“Hey, wutawai myse maet.”

“Kushuu thenks, en yu?”

“Ahh, I gud a tun. I dar sik o Kremes shopen I wesh I el go farser.”

“I no wuthen yu meen. Mebbe wii shuud boro sum o dem ‘lecktrik baik dar kownsel se buy.”

“Yu meen ‘ skuuta nort, So?”

“Oh no, myse maet. Yu torken bowt lars yairs baiks. Dar kownsel se bi twenti nu ‘lektrik baik en dem se git ya dis wiik.”

“But So, dem ooni bin gut dem skuuta short letl. Fuut dem niid wun ‘lektrik baik?”

“Waal I thort es part o’ dem luuken cleen en green. Kaa fuut maiself, kos awas powa es dar tai tai en kors heeps, but yu no dem es smarta than aklan.”

“But So, dar kownsel tul dem es broek, en dem baiks dem gut nor ewin faiv yair ol. Dars fals economy.”

“Yu mait thenk dar Guta, but when dem driwen dem theng roun a road, gwen mek ‘ salan thenk tu theng.”

“Wuts dar So?”

“Waal, wen dem peddlen orl ova, salan gwen thenk dem is fit un. Dem tures gwen thenk dem luw dems jorb so muj dem el pedl orl abowt. Wunda ef dem gut a stika en wun oranj flag so wii el sii dem bata.”

“So, yu just joshen now.”

“Es truu I stollyen, but yu no gwen luuk laik dar. En semes a theng, yu kaa bring o’er wun batri een a weeljair orn a playn ‘less yu bring et een dar cabin. Yu kaa fly eni o dem lithiyum batri f’ myse lektrik tuuls een a frayt, but dem el fli en twenti o dem skuuta. Wun ruel f’ sum waa?”

“Oh dar kaa bi rait. Wii nor gut deferent ruel f’ deferent salan ya So!”

“Ess truu ess da bible…so dem tull!”