So Dem Tull - dem League Lejinds

So∙Dem∙Tull torken gen Baeng Orn.

“Wus guud un f’ sii dem League Lejinds ya lars wiik.”

“Waal, I hope yu el rememba dar wen yu payen yus raets.”

“Wuthen yu torken bout, So?”

“How yu thort dem get ya, brudda?”

“Orn wun plaen, I thort.”

“Ef yu thenk dem sey kum ya en pai furret frum dems own pokit, yu es mard es a gott.”

“Waa?”

“Waal, orl dem departmints een dar kownsel gut wun speshul fund ulla budjit dem el yus f’ watewa es needid. Dar kownsel tek sum o dem funds frum orl dem’s budjit, en yuse et tu pai f’ orl dem f’ fly ya, stai en et ya.”

“Es trew? Wuthen gwen hapin ef dem departmint gut wun emerjensi? Wuthen hapin ef dar ayrstrip get wun nada sink hoel ulla dar libary git a leakii ruuf.”

“Ahh, domine ef dem niid et ulla nort. Yu fine dem el putt dem munni bak siid et belorng wen salan pai dems raets.”

“Yu thort dar gwen hapin?”

“Waal, kors 140 thowsen f’ bring dem o’er ya. Dem gwen hat f’ putt et bak sumhow.”

“Noa! Dar ent truu So. I no yu debargenen.”

“Ess truu ess da bible…so dem tull!”