So Dem Tull #8

I go een f’ pay f’ myse petrol da tada dai and whu shuld bi behin ar counter but So∙Dem∙Tull!

“Hey So, I nort no yu gut wun nu jorb.”

“I nor bin ya lorng. Truly, di es d’ bass side f’ ya orl dem theng. Yu kaa b’leew wuthen I bin ya since I bin ya. Plenti salun bin larna mi wuthen gwen orn. I een overload!”

“Waal dars a guud theng waa? Kaa du wii ort no wuthen gwen orn.”

“True dar! Yu bin ya da dump gwen under kontrakt? Sum kompany up en Byron Bay bin gut it. Es multi million dollar deal. Kaa halp but wunda how dems se pay furret.”

“Dems se get orl waste manajment?”

“No, dem nor wunt dar composter. Semes a theng, dar theng se brek moosa much es worken! De mob brengen o’er dems ekwipmint en gwen modernise aklun. Gwen tek o’er en September. I tull yii, wuthen next?!”

“Miword, waal wi no wuthen dar mean, unay?”

“Yup, wi thort wi es payen tu much fi awus waste now. Wi een fi wun beeg shok!”

“Yup, gut no services, but wi el pay dearly for rubbish wi bin sort en tek to dar dump. Myse $104.00 tickets I get lornga myse rates nor gwen do much, unay?”

“Yu el waiv goodby longa dem, myse maet. Orn nada note, yu bin ya bout dar glars crusha?”

“Noh. Du tull. Wuthen now?”

“Waal, dems se dunna yuse et kos es tu taim consuming en nor mek a defrence. Money waal spent waaa?”

“Yu tullen mi, dem spen o’er 30 thou en se giw up orlreddi? Surely yu stollyen!”

“Ess true ess da bible…so dem tull!”