So Dem Tull #2

So∙Dem∙Tull torken gen his maets Dunna Nehsi en Gutta Hilli dis dae et dar Leagues Club. He lean krors dar taebel f’ speak.

“Yorlye noh wuthen hapin dar tada dai?”

“Dars wen yuse missus mek yu go een ‘ howse wen yu kill hers roses?”

“Noa, dunna mard. Hapin wai b’for dar en I nor gwen arsa yu how yu no bowt dar. Miwurd dem gael el gosup!”

“Truu dat. Wuthen gwen orn, So?”

“Waal dar mein frum Bean go o’er d’ wai to visit dem English salan.”

“Ah dars nice. Es guud un f’ sii orl dem politishun getten orn.”

“You mait bi el thort dar, but en trewth es wun teratori theng.”

“Waaa? Wuthen yu torken bowt, So?”

“Waal, semes wen yorlye come o’er mine f’ wun ninni ulla tuu. Mys dawg go o’er to yuse yute en kok a laig on yuse tiyr.”

“Waaa? Dar nor mek sens?”

“Indiid et du. Kors, wen yu get home, yuse dawg snif dar tiyr en wunt f’ let myse dawg no ent his, so hi kok a laig een d’ saim plais.”

“Trewly I gut no idiya wuthen yu torken bowt So.”

“Waal dem politishun noh wi bin tork gen dem English salan en dem wunt f’ mark dem’s teratori. Soh hi bin goh rown, orl abowt, larnen hi es awus demakratikly elektd representative en du yu wurri, Norf’k duen guud thaenks.”

“Waal dars nehsi, kors ent truu. Wii en wun sad staet o’ afayrs ya.”

Es truu ess da bible…so dem tull!”