So Dem Tull #14

So∙Dem∙Tull up ar RSL dar tada nait.

“Ahh waal mys maet, bin a big week en sheppen…”

“Wuthen yu torken bout?”

“I bin ya dar barj nor comen cos dem letl barj nor worken.”

“Fuut nor worken?”

“Waal dem outboard se brek, en cors 150 thousand to replace. Dem bin sen wun salan o’er ya five taim f’ fix et, but kaa du. Gutta sii wata en em elektriks”

“Soo, how kum wi nor bin ya bout de soona?”

“Yu thort dem gwen larm aklan wen dem sey belli up? Indeed not, dem gwen debargen orl es ohkay.”

“So yu larnen mi dar barj nor comen now?”

“No nort. En had plenti car orn board. Yu hat f’ feel sohri f’ orl dem salan bin pay plenti f’ storage en nor gut enithen f’ show furret.”

“Es true. Waal thaenk gudnis wi still gut ar shep comen, waa?”

“Yu bin ya dem nor gwen yuse literaj or stevidor?”

“waa?”

“Dem belew dem gwen bak up orn tu Kaskaid pya en unload em contaynas weth wun krain.”

“Waa? So dem nor gwen employ eni o’ dem shep workas?”

“Nup. Dem brengen dems own workas f’ unload.”

“Es tru? Es da kos dem kaa yuse dem barjs?”

“Waal mebbe. Mine yu, mebbe gut nada reasen f’ nor yusen aklan f’ unload ar shep.”

“Wuthen yu mean?”

“Waal, dem tull es wun minen survey shep. Mebbe dem yuse et f’ luuk orn wuthen dem el mine en awas water. Ulla mebbe, dem nor wunt eni o’ aklan orn ar shep tu confirm dars d’ truth of the matta. If dem workas kaa sii wuthen orn ar shep, dem kaa tull orl aklan, unay?”

"Wuthen gwen happen ef nor wurk?"

"I kaa waa. I thenk ar shep gwen tun roun start."

"Wii kaa yuse em liters?"

"Hah! Yu no dem es hellbent wi newa ewa gwen yuse dem gen. Eni theng mek us defrent gwen kaa du. Dem nor comprehend wi bin du et serten wai kos et bin wurk guud...."

“Surely da kaa bi rait. Truly dar kaa du….”

Ess true ess da bible…so dem tull!”