So Dem Tull #12

So∙Dem∙Tull teken wun brek daa tada dai. Hi torken longf’ hes maet.

“Hey, yu bin read orl dem nu charjs dem thenken o slingen orn uklan?”

“Sure haw. I kaa belew how much dem gwen charj awa f du nothen deferent.”

“Unay, es criminal. Myse rates gwen thru d’ ruuf.”

“Fuut yu thort dem sey up dems charjs so much?”

“Waal, I bin thenk orn et f’ sum taim. Rememba, back en So Dem Tull #8, I tulla orl yorlye bout ar new contrakta teken o’er Waste Management en Septemba?”

“Yeah.”

“Rememba I tull orl yorlye es wun multi-million dollar deal?”

“Dars rait.”

“En yu rememba I ars orl yorlye how yu thort dem gwen pay furret? Waal, ent dem gwen pay furret, es uklan.”

“I ne’er thenk orn da. So dem el hya wun contrakta en charge orl ucklan furret?”

“Yu betchie. Ess true ess da bible…so dem tull!”