So Dem Tull

So∙Dem∙Tull torken longfe his mum orn ‘ fone.

“Yu no waa Ma, wi gwen hat f’ putt em katl bak en awas padok. Dem tryen f’ putt a kolla orn dem instead o yusen elektrik fanse.”

“Laik dem bin yuse orn a dorg?”

“Es truu, ewen tho dem nort RSPCA approved. Dar katl groop bin meet longfe dem en dem tull noa thenks.”

“Wuthen hapen?”

“Dem arsa dar katl groop ef dem el do a trial. Dar groop tull dem mait konsida et. But dem se gorn ‘head en pay $100,000 to get ‘nuf f’ orl dem katl.”

“Waa? Dem shor gwen wurk?”

“Indeed dem nort. Simes a theng. Dem kolla bin es yused en d’ owtbak, so gut wun area o’ thowsand kilometres. Domine ef youse barrier es owt by a metre or tu, kos yu gut plenti land f’ dem katl tu grayz.”

“How de theng work So∙Dem∙Tull?”

“Es dun weth satellite, so nor gwen bi as akurat as a buryen a wyre or elektrik fanse. Mark mi wurds.”

“So orn em narrow bits, dar barrier mait bi tu waid ulla tu narrow?”

“Dars rait. En yu no waa? Dem so shor gwen work, dem alreddi dismantlen dem elektrik fanse yunet doun a toun.”

“Waa?! Dars krayzi. Fuut dem nor test et owt fuss?”

“Oh Ma, dem no so muj mor than aklan, an domine wuthen wi tull dem gwen du et daffi.”

“Unay, I kaa belew es truu.”

“Ess true ess da bible…so dem tull!”